İran prezidentinin dövlət iqamətgahında Azərbaycan Respublikasının Prezidenti Heydər Əliyev ilə İran İslam Respublikasının Prezidenti Seyid Məhəmməd Xatəmi arasında təkbətək görüş olmuşdur.
Azərbaycan prezidenti Heydər Əliyevi hörmət və ehtiramla salamlayan İran prezidenti Seyid Məhəmməd Xatəmi dəvətini qəbul edib Tehrana rəsmi səfərə gəldiyinə görə respublikamızın rəhbərinə minnətdarlığını bildirdi. Cənab Məhəmməd Xatəmi böyük siyasi təcrübəyə malik olan müdrik dövlət xadimi Heydər Əliyev ilə hər bir görüşü çox faydalı və dəyərli hesab etdiyini bir daha nəzərə çatdırdı
Prezident Heydər Əliyevin Tehrana rəsmi səfərinin İran–Azərbaycan əməkdaşlığında yeni üfüqlər açdığını vurğulayan prezident Seyid Məhəmməd Xatəmi bu səfərin ölkələrimizin qarşılıqlı surətdə faydalı əlaqələrinin inkişafında mühüm mərhələ olduğunu bildirdi.
Səmimi sözlərə, rəsmi səfərə dəvətə görə təşəkkür edən prezident Heydər Əliyev dost və qonşu ölkədə ona və Azərbaycan nümayəndə heyətinə göstərilən qonaqpərvərlikdən məmnun qaldığını söylədi. Azərbaycan–İran ikitərəfli münasibətlərinin inkişaf etdirilməsi barədə geniş müzakirələr aparan prezidentlər bütün sahələrdə əməkdaşlığın daha da genişləndirilməsinin və dərinləşdirilməsinin zəruri olduğunu bildirdilər.
İqtisadi əlaqələrin inkişafında böyük əhəmiyyəti olan layihələrdə ölkələrimizin iştirakının vacibliyini nəzərə çatdıran dövlət başçıları Şimal–Cənub nəqliyyat dəhlizinin geniş perspektivləri olduğunu yekdilliklə təsdiq etdilər. Xəzərin hüquqi statusu məsələsindən söhbət açan prezidentlər sahilyanı ölkələrin bütün sahələrdə əməkdaşlığının daha da sıxlaşdırılmasının böyük əhəmiyyət daşıdığını, Xəzərin bundan sonra da sülh, təhlükəsizlik və əməkdaşlıq dənizi olacağına ümid bəslədiklərini bildirdilər. Prezidentlər Xəzərin hüquqi statusunun müəyyənləşdirilməsi ilə bağlı ekspertlər səviyyəsində müzakirələrin davam etdirilməsinin zəruriliyini vurğuladılar.
Görüşdə prezidentlər ölkəmiz üçün ən ağrılı problem olan Ermənistan-Azərbaycan, Dağlıq Qarabağ münaqişəsinin sülh yolu ilə aradan qaldırılması məsələsinə də geniş yer ayırdılar. Prezident Heydər Əliyev xatırlatdı ki, Ermənistan silahlı qüvvələrinin təcavüzü nəticəsində Azərbaycan torpaqlarının 20 faizi hələ də işğal altında qalmaqdadır, bir milyon azərbaycanlı uzun illərdən bəri çadırlarda ağır şəraitdə yaşayır.
Münaqişənin sülh yolu ilə həll edilməsi üçün aparılan danışıqlar prosesindən bəhs edən prezident Heydər Əliyev bu münaqişənin tezliklə aradan qaldırılması sahəsində Minsk qrupunun üzvü olan dövlətlərin səylərinin artırılmasının vacibliyini nəzərə çatdırdı.
Ermənistanın Azərbaycana təcavüzünün İran tərəfindən pislənildiyini və İranın bunu beynəlxalq təşkilatlarda açıq elan etdiyini vurğulayan prezident Seyid Məhəmməd Xatəmi bu münaqişənin hələ də həll olunmamasından öz ölkəsinin narahatlığını bildirdi və münaqişənin tezliklə aradan qaldırılmasının bölgədə sülhün və əmin-amanlığın bərpa edilməsində mühüm rol oynayacağına əmin olduğunu söylədi.
Qədim tarixi ənənələrə malik qonşu və dost ölkələrimizin elm, təhsil, mədəniyyət və digər sahələrdə əlaqələrinin hazırkı vəziyyəti barədə müzakirələr aparan prezidentlər bu əlaqələrin daha da sıxlaşdırılmasının vacibliyini vurğuladılar.
Görüşdə prezidentlər bölgədə vəziyyət, hər iki ölkəni maraqlandıran bir sıra digər məsələlər barədə də geniş fikir mübadiləsi apardılar. Prezident Heydər Əliyev prezident Seyid Məhəmməd Xatəmini Azərbaycana bir daha rəsmi səfərə dəvət etdi. Dəvət məmnunluqla qəbul olundu.