24 yanvar 1995-ci ildə Azərbaycan Tarix Muzeyində Azərbaycan Prezidenti Heydər Əliyevin iştirakı ilə "Əsrin müqaviləsi" üzrə Rəhbər Komitənin iclası keçirilib. Burada müqavilənin həyata keçirilməsi üçün lazımi hüquqi baza yaradıldıqdan sonra konkret işlərin həyata keçirilməsi üzrə plan müzakirə edilib. İclasda ABƏŞ-in prezidenti Terri Adams, konsorsiumda təmsil olunan xarici neft şirkətlərinin rəhbərləri və Azərbaycan Respublikasının dövlət və hökumət adamları iştirak edib.
İclası giriş sözü ilə Azərbaycan Respublikası Dövlət Neft Şirkətinin prezidenti Natiq Əliyev açaraq görülən işlər və iclasda müzakirə olunacaq məsələlər haqqında məlumat verib.
Həmin gün "Əsrin müqaviləsi" üzrə 1995-ci ildə görüləcək işlərin proqramı və büdcəsi təsdiq edilib. Məhz bu tarixdən sonra Azərbaycan neft strategiyasının əməli surətdə həyata keçirilməsi işinə start verilib.
Yataqların işlənməsi dörd əsas hissəyə bölünüb: hazırlıq mərhələsi, 1-ci tammiqyaslı işlənilmə mərhələsi, 2-ci və 3-cü tammiqyaslı işlənilmə mərhələsi. İclasda çıxış edən Azərbaycan Prezidenti Heydər Əliyev bu müqaviləni reallaşdırmaqla Azərbaycanın xarici neft şirkətləri ilə birgə əməkdaşlıq təcrübəsinin artmasına və bu sahədə gələcəkdə münasibətlərin inkişafında xüsusi rol oynayacağına inandığını bildirib.
Tarixi arayış 30 iyun 2008-ci ildə yeniləşdirilib.